ЕВРОПА ЈА РАЗБЕСНИ КИНА: Поголеми царини за кинеските електрични возила

Европската комисија објави дека од утре воведува нови царини до 37,6 отсто за кинеските електрични возила.

Од Комисијата истакнуваат дека со новите царини се спротивставува на оние, како што ги нарече, „нечесни“ субвенции што кинеските производители на електрични возила ги добиваат од кинеската влада. Субвенциите, според Европската унија, создаваат „закана со економска штета“ за европските производители на автомобили.

Од утре новите привремени давачки ќе им се додадат на веќе постоечките увозни царини од 10 отсто. Конечната одлука за царините е закажана за ноември, затоа што Брисел и Пекинг се обидуваат да го решат конфликтот преку преговори, пренесува „Дојче Веле“.

„Нема основа Кина да возврати откако ЕУ најави дека ќе воведе царини до 37,6 отсто на увоз на електрични возила произведени во Кина“, рече денес шефот за трговија на ЕУ, Валдис Домбровскис, во интервју за „Блумберг“.

Претседателката на Европската комисија, Урсула фон дер Лајен, рече дека новите привремени царини на Комисијата од 17,4 до 37,6 отсто имаат за цел да ја запрат заканувачката поплава од евтини, државно субвенционирани електрични возила.

Европската комисија минатиот месец првично ги објави привремените царини, кои се речиси идентични со оние кои ќе се применуваат од утре.

Телата на Комисијата, сепак, направија мали корекции откако компаниите укажаа на мали грешки во првичните пресметки.

Во следните четири месеци царините ќе бидат привремени додека двете страни продолжуваат со интензивните преговори, соопшти Европската комисија.

Од Пекинг, пак, велат дека планираат да ги преземат „сите потребни мерки“ за да ги заштитат интересите на Кина. Кинеските власти размислуваат да воведат нови царини за производи како што се коњак и свинско месо увезени во Кина како одмазда.

„Досега двете страни одржаа неколку рунди технички разговори за царините за ова прашање“, соопшти денеска кинеското Министерство за трговија.

„Остануваат уште четири месеци до арбитражата и се надеваме дека европската и кинеската страна ќе се движат во иста насока, ќе покажат искреност и ќе продолжат со процесот на консултации што е можно поскоро“, рече Хе Јадонг, портпарол на министерот.

Не се сите кинески производители на електрични возила вознемирени од новите царини.

„Царините ќе имаат само скромно влијание врз повеќето кинески компании“, соопшти Кинеската автомобилска асоцијација.

Фирмите кои соработувале со антисубвенциската истрага на ЕУ, вклучително и западните фирми како „Тесла“ и „БМВ“, ќе се соочат со царина од 20,8 отсто за возилата произведени во Кина. Тие, пак, кои не соработувале ќе се соочат со тарифа од 37,6 отсто.

Европската комисија проценува дека кинеските марки го зголемиле својот удел на пазарот во ЕУ на осум отсто, еден отсто помалку во 2019 година и дека би можеле да достигнат 15 отсто до 2025 година. Исто така се истакнува дека цените на кинеските електрични возила општо земено се 20 отсто пониски од возилата произведени во ЕУ.

Креаторите на европските политики имаат за цел да спречат повторување на кризата со соларни панели од пред десет години, кога ограничената акција на ЕУ за кинескиот увоз доведе до колапс на многу европски производители.